Kuri uyu wa Gatatu tariki ya 11 Gicurasi 2022, Itsinda ry'Abasenateri muri Komisiyo y’Imibereho y’Abaturage n’Uburenganzira bwa Muntu batangiye Uruzinduko rw'Akazi rw'Iminsi Ibiri mu Karere ka Musanze, aho baje mu gikorwa cyo Gusura Amavuriro n’Ibigo Nderabuzima hagamijwe kumenya no kugenzura Ibikowa bya Guverinoma mu Birebana n’Imitangire ya Serivisi z’Ubuvuzi n’Imivurire y’Indwara Zitandura mu Mavuriro n'Ibigo Nderabuzima.

Iri tsinda rigizwe na Hon. Senateri UMUHIRE Adrie (Uyoboye Itsinda, ari na we Perezida w'iyi Komisiyo), Hon. Senateri HABIYAKARE François n'Umukozi wa Komisiyo ubunganira.

Iki gikorwa cyabimburiwe n'inama yabereye mu Cyumba cy'Inama cy'Akarere ka Musanze, yabahuje n'Itsinda ry'Akarere n'iry'Ibitaro Bikuru bya Ruhengeri, aho bakiriwe n'Umuyobozi w'Akarere Wungirije Ushinzwe Imibereho Myiza y'Abaturage, Madamu KAMANZI Axelle, wari kumwe n'Umuyobozi Mukuru w'ibi Bitaro, Dr.MUHIRE Philbert, wabagaragarije ishusho rusange muri uru Rwego rw'Ubuzima.

By'umwihariko, ku bijyanye n'ibyifuzo n'ibitekerezo by'abarwayi, abivuza muri NCDs barashima byimazeyo uko Abaganga babakurikirana (NCDs Nurses), ariko bakifuza ko, nk'uko boroherejwe bagahabwa ahantu habo bakirirwa bakanavurirwa, banahongera n'aho bishyurira.

Umwe muri bo yagize, ati: "Abaganga bacu twaramenyeranye, badufate nk'abana babo, iyo tubabonye twumva twahita twirukanka tukabahobera." Undi na we, ati: "Saa moya za mu gitondo baba batangiye kudukorera, ubu ab'intege nke bamaze gutaha."

Muri rusange, nyuma yo kugirana ikiganiro n'Ubuyobozi bw'Akarere, ubw'Ibitaro ndetse n'Abahagarariye Serivisi zitandukanye mu Bitaro, aho bakirira abarwayi, aho bakurikiranira ab'indwara zitandura, aho abarwayi bishyurira, aho bafatira imiti n'ahavurirwa indwara z'abana ndetse no kuganira n'abari baje kwivuza, Abasenateri bashimye uko abaturage bishimira serivisi bahabwa, nubwo ntabyera ngo de, ugereranyije n'umubare w'Abakozi b'Ibitaro n'uw'abarwayi bakira, ibikoresho bidahagije n'Ibitaro bya kera bishaje bakoreramo.