Iyi ni Insanganyamatsiko y'Umunsi Mukuru Mpuzamahanga Ngarukamwaka w'Abarwayi, wizihijwe kuri iki Cyumweru tariki ya 12 Gashyantare 2023.

Mu Bitaro bya Ruhengeri Byigisha ku Rwego rwa Kabiri, wabimburiwe n'Igitambo cya Misa, cyatuwe na Nyiricyubahiro Musenyeri, Umushumba wa Kiriziya Gaturika Diyoseze ya Ruhengeri, Visenti HAROLIMANA.

Uyu Munsi Mukuru wari witabiriwe n'abantu mu ngeri zitandukanye, barimo Umujyanama wa  Guverineri w'Intara y'Amajyaruguru, Bwana KARAKE Ferdinand, ari na we wari Umushyiytsi Mukuru, Umuyobozi w'Akarere ka Musanze Wungirije Ushinzwe Imibereho Myiza y'Abaturage, Madamu KAMANZI Axelle, Inzego z'Umutekano, Perezida wa Komite y'Ubuzima y'Ibitaro, Bwana BAGIRUWUGIZE Emmanuel,  Abafatanyabikorwa mu Nzego zitandukanye mu kwita ku barwayi barimo n'abo mu Madini n'Amatorero, Abakozi mu Bitaro, Abarwayi n'Abarwaza n’abandi.

Ubutumwa bwatangiwe muri uyu muhango bukaba bwahurije ku kwihanganisha no guhumuriza abarwayi n'abarwaza, gushimira Ubuyobozi bw'Igihugu budahwema kwita ku cyateza imbere imibereho y'abaturage, gushimira Abaganga ku muhamagaro wabo ukomeye, n’umubare munini w’abarwayi bakira, bityo basabwa ko umutima w’urukundo n’impuhwe byajya bijyana n’ikinini, guhamagarira abantu kumva ko kwita kubarwayi no kubabaye muri rusange ari inshingano za buri wese.

Ibi byaherekejwe no gutanga Certificates kuri bamwe mu Bafatanyabikorwa basura abarwayi mu buryo buhoraho muri ibi Bitaro (buri munsi, buri cyumweru, buri kwezi, ...), bashyikirijwe n'Umuyobozi Mukuru w'Ibitaro, Dr.MUHIRE Philbert, ari na we watanze ikaze.

Ahawe umwanya w’ijambo, Umurwayi uhagarariye abandi yashimye ubuvuzi bahabwa umunsi ku wundi ndetse no kuri uyu munsi bazirikanwaho by’umwihariko.

Aha, Umushyitsi Mukuru akaba yaboneyeho no gusaba abaturage gushyiraho akabo bihutira gutanga ubwisungane mu kwivuza ku gihe, kugira isuku, gutegura indyo yuzuye, kwirinda ibiyibyabwenge, by'umwihariko ku Rubyiruko.

Wasojwe no gusura abarwayi mu byumba barwariyemo, kubaha impano zitandukanye zirimo imyambaro n'ibikoresho by'isuku ndetse no kubagaburira.

Ubusanzwe, uyu Munsi wizihizwa ku itariki ya 11 Gashyantare, biturutse ku Gitekerezo cya Mutagatifu Yohani Pawulo wa Kabiri, ku itariki ya 11 Gashyantare 1993, wari Papa icyo gihe, wasabye abantu bose bafite umutima mwiza kwifatanya na Kiriziya mu Murage wayo wo kwita ku babaye no kongera gutura Imana ububabare bwose bw'abantu n'ubw'Isi yose, kubafasha no kubatega amatwi, by'umwihariko abatereranwe, kugira ngo babone ko koko bafite Imana n'abavandimwe babakunda batari bonyine.

Bikaba byari byahujwe n'Umunsi Mukuru wa Bikiramariya w'i Lourdes wahimbajwe ejo hashize.