Ari kumwe n'abandi Bayobozi mu Nzego zitandukanye, kuri uyu Munsi w’Icyumweru, tariki ya 24 Ugushyingo 2024, Umuyobozi Mukuru w’Ibitaro bya Ruhengeri, Dr. MUHIRE Philbert, bifatanyije yifatanyije n'Abaturage batuye, bakorera n'Abasura Akarere ka Musanze bari bitabiriye Siporo Rusange yo Gutwara Igare, yabereye mu Mujyi wa Musanze, yateguwe ku bufatanye n’aka Karere.

Muri iki gikorwa cyari kiyobowe n’Umuyobozi w’Akarere ka Musanze Wungirije Ushinzwe Imibereho Myiza y’Abaturage, Bwana KAYIRANGA Theobald, abari bitabiriye bazengurutse imihanda itandukanye y'Umujyi wa Musanze no mu nkengero zawo, basoreza ku Kigo cy'Urubyiruko cy' Akarere giherereye inyuma y’Inyubako y’Ibiro by’Umurenge wa Muhoza uyu Mujyi uherereyemo.

Ubutumwa bwatanzwe bwahurizaga ku gushimira abari aho kubasaba kuba intumwa nyazo mu gukangurira abandi ibyiza byo gukora siporo, bahereye mu miryango yabo, abaturanyi n’inshuti, dore ko na bo ubwabo batanze icyifuzo cy’uko yajya iba ngarukakwezi, nk’imwe mu nkingi za mwamba mu kurwanya no kwirinda indwara, by’umwihariko zitanndura (NCDs), ukaba n’umwanya mwiza wo kumenyana no gusabana. 

Ibitaro bya Ruhengeri, ku bufatanye n’Ibigo Nderabuzima, bikaba bitanga ku buntu serivisi yo gupima izi ndwara ku bantu baba bitabiriye Siporo.