Kuri uyu wa Gatandatu, tariki ya 27 Gicurasi 2023, Abakorera mu Bitaro bya Ruhengeri, abavura n’abatavura, mu byiciro bitandukanye, babyukiye gikorwa cy’Umuganda Rusange Ngarukakwezi mu Bigo by'Ubuvuzi, uwa Gatandatu wa Nyuma w'Ukwezi usanzwe warahariwe Umuganda Rusange mu Gihugu hose muri rusange, mu Turere tugize Intara zose n’umujyi wa Kigali, muri ya gahunda yo kwishakamo ibisubizo ku bibazo bitwugarije binyuze mu guhriza hamwe imbaraga, ukaba n’umwanya mwiza wo kuryushaho kumenyana no gusabana.

Umuganda w’uku Kwezi kwa Gicurasi, muri ibi Bitaro, ukaba wibanze ku gutanga inyunganizi ku Bakozi b’Isuku muri Serivisi ya "Pédiatrie", bayobowe n'Umuyobozi w'Ishami ry'Abaforomo n'Ababyaza, Madamu INGABIRE Clémentine, mu izina ry’Ubuyobozi Bukuru, hakorwa amasuku imbere n'inyuma y'iyo Nyubako.

Abitabiriye, ndetse n’abari baharwarije, bahamagariwe gukomeza kwimika umuco w’isuku aho bari hoise, ku mubiri, ku myambaro, aho barara, mu mafunguro, aho bakorera n’ahandi, hazirikanwa ko Isuku ari yo Soko y’Ubuzima.