N'imbaduko nyinshi kuri buri wese, mu gitondo cyo kuri uyu wa Gatandatu tariki ya 28 Mutarama 2023, Abakorera mu Bitaro bya Ruhengeri Byigisha ku Rwego rwa Kabiri, bahagarariye abandi muri serivisi zitandukanye, babyukiye muri wa Muganda Rusange Ngarukakwezi, watangijwe Umwaka Ushize wa 2022, ukorerwa mu Bigo by'Ubuvuzi, hagamijwe by'umwihariko kurushaho Kwimakaza Umuco w'Isuku. 

Muri uyu muganda, Ubuyobozi bw'Ibitaro bwari buhagarariwe na “Clinical Director”, Dr. HIRWA Aimé, abitabiriye bakaba bahurije hamwe imbaraga mu masuku yo hanze.

Nyuma y'umuganda, bahuriye mu mwanya usesuye wo kungurana ibitekerezo ku byafasha mu kurushaho kuzamura imitangire ya serivisi muri rusange no mu kubyaza umusaruro iyi gahunda y'umuganda by'umwihariko.

Ni mu gihe Umuyobozi Mukuru w'Ibitaro, Dr.MUHIRE Philbert, we yari yifatanyije n'Akarere ka Musanze mu Muganda Rusange wabereye mu Murenge wa Muhoza ku Rwego rw'Akarere, aho yatanze ubutumwa bujyanye no gukangurira abaturage kwitabira serivisi zitangwa n'Abajyanama b'Ubuzima zirimo gusuzuma no kuvura indwara nka Malaria, Umusonga, Impiswi n’izindi,  kuboneza urubyaro, gukurikirana ababyeyi batwite, … .

Uretse ubu butumwa bwavuzwe haruguru yatanze kandi, Itsinda ry’Abakozi b'Ibitaro yari kumwe naryo ryasuzumye abawitabiriye Indwara Zitandura (Umuvuduko w'Amaraso na Diyabeti), ku bufatanye n’Ikigo Nderabuzima cya Muhoza.

Umuganda, inkingi ya mwamba mu kwishakamo ibisubizo bibangamiye Umuryango Nyarwanda!