Ibi ni ibikubiyemo impanuro   zijyanye n'Icyumweru cy'Ubuzima bw'Umubyeyi n'Umwana, cyatangijwe mu Karere ka Musanze, kuri uyu wa Mbere tariki ya 27 Ugushyingo 2023, (27/11- 01/12/2023), kimwe n'ahandi hose mu Gihugu, ku Nsanganyamatsiko igira, iti: "Hehe n'Igwingira ry'Umwana." 

Ku Rwego rw'Akarere ka Musanze, cyatangirijwe ku mugaragaro ku Biro by'Umurenge wa Kimonyi;  Umushyitsi Mukuru yari Umuyobozi Mukuru w'Ibitaro bya Ruhengeri, Dr MUHIRE Philbert, wari kumwe n'Intumwa ya RBC, Madamu Alice UMUTONI, Umuyobozi w'Ishami ry'Ubuzima wari uhagarariye Akarere, Madamu MUKAYOBOKA Vestine, n'abandi Bayobozi n'Abakozi batandukanye.

Abitabiriye bibukijwe banashishikarizwa Serivisi zitangwa muri iki Cyumweru, gitegurwa Inshuro 2 mu Mwaka, zirimo gutanga Vit A ku Bana barindwa ubuhumyi (kuva ku mezi 6- 59), ibinini by'inzoka (kuva ku mwaka ariko no kubantu bakuru muri rusange), gusuzuma no gutanga Ongera (kuva ku mezi 6- 23), gupimwa ibiro, ikizigira n'uburebure, gukingira abana barimo n'abacikanwe, kuboneza urubyaro ku babyeyi, gupimisha inda ku batwite ndetse no kubakingira.

Umuyobozi Mukuru w'Ibitaro yasoje yongera gushimira Abajyanama b'Ubuzima anahamagarira abaturage, abagabo n'abagore, gufatanya n'Ubuyobozi bw'Igihugu muri muri uru rugamba rw'Iterambere ryubakiye ku Muturage Ushoboye,  gushyigikira Serivisi y'Ingo Mbonezamikurire ku Mudugudu no ku Mashuri no kwimakaza umuco w'isuku n'isukura hose no muri byose.