Kuri uyu wa Gatandatu tariki ya 30 Nyakanga 2022, ku Munsi w'Umuganda Rusange Ngarukakwezi mu Gihugu, hatangiye na Gahunda y'Umuganda Rusange mu Bigo by'Ubuvuzi, na wo ugiye kujya ukorwa buri Kwezi, yateguwe na Minisiteri y'Ubuzima, ku Nsanganyamatsiko igira, iti: "Tugirire Isuku Aho Dukorera!".

Ni nyuma y'ingendo zitandukanye zagiye zikorwa n'Abayobozi muri iyi Minisiteri bagasanga hari ibikorwa byinshi byajya bikemurwa n'uyu muganda.

Iyi gahunda, yaje ikenewe, ikaba yibanze ku bikorwa by'isuku: gusukura inyubako hibandwa ahakenewe isuku yihariye, gukusanyiriza hamwe ibikoresho bitagikoreshwa, bikabarurwa, bigacungwa uko amategeko abiteganya, gukora no gutunganya ubusitani, gukuraho ibigunda aho biri, ukaba wabaye n'umwanya mwiza wo guhuriza hamwe Abakozi bakarebera icyateza imbere aho bakorera no gufata ingamba zitanga ibisubizo birambye mu mikorere n'imikoranire hagati yabo n'Abayobozi no hagati y'Abakozi ubwabo.

Mu Bitaro Bikuru bya Ruhengeri, Abahakorera batunganyije ibyumba bibikwamo ibitabo (Tools) bikoreshwa mu Gukurikirana Ibikorwa by'Ubuvuzi mu Mavuriro no mu Bajyanama b'Ubuzima, bakora inzira igana ku bwiherero rusange bwo muri Service ya Pédiatrie hashyirwamo amabuye n'itaka bikumira kureka kw'amazi, banasiba ibinogo by'amazi kuri Service ya Internal Medecine.

Nyuma y'umuganda, Umuyobozi Mukuru w’Ibitaro, Dr.MUHIRE Philbert, yashimiye abitabiriye, banungurana ibitekerezo mu nama bafataiyemo imyanzuro 4 ariyo kongera ubwitabire ku Muganda w'Ukwezi Gutaha bigizwemo uruhare n'Abakozi Bayobora Abandi ndetse n'Ubuyobozi bw'Ibitaro muri rusange, kugaruka ku Ndangagaciro z'Imyitwarire y'Abaganga n'abandi bakora mu Bitaro, kurushaho kunoza Serivisi Zihabwa Abarwayi no kwitabira Siporo y'Abakozi ya buri wa Gatanu guhera i saa cyenda z’umugoroba (15h00’).