Kuri uyu wa Gatatu tariki ya 16 Ugushyingo 2022, ku Kigo Nderabuzima cya Karwasa, kimwe mu Bigo Nderabuzima 16 bishamikiye ku Bitaro Bikuru bya Ruhengeri, giherereye mu Murenge wa Cyuve, mu Kagari ka Bukinanyana, mu Mudugudu wa Mwidagaduro, habereye Umuhango wo Kwizihiza Isabukuru y'Imyaka 40 Umuryango Mpuzamahanga wa "OPERATION SMILE" umaze ukora; igikorwa cyanahujwe no Gutangiza ku Mugaragaro Ubufatanye mu Mikoranire n'Abajyanama b'Ubuzima.

Uyu ukaba ari Umuryango ukorera mu Bihugu bigera kuri 30 hirya no ku Isi mu bijyanye n'Ibikorwa by'Ubuvuzi, by'umwihariko mu Kubaga Indwara y'Ibibari n'Ubusembwa bw'Umubiri butandukanye. Mu Rwanda, umaze imyaka 13 ukorana n'Ibitaro bitandukanye, birimo n'Ibitaro Bikuru bya Ruhengeri bakorana kuva mu Mwaka wa 2020.

Ibi birori byari byitabiriwe n'Abayobozi mu Nzego zitandukanye barimo Intumwa ya Minisiteri y'Ubuzima, Dr.Cyprien IRADUKUNDA (Umuyobozi Ushinzwe Amavuriro), ari na we wari Umushyitsi Mukuru, Andrew KARIMA (Country Manager wa Operation Smile) n’Itsinda ry’Abashyitsi bari baturutse muri bimwe mu bindi Bihugu uyu Muryango ukoreramo, MANIRIHO Israel (Umukozi Ushinzwe MUSA mu Ishami ry'Ubuzima mu Karere), Dr.HIRWA Aime (Clinical Director mu Bitaro Bikuru bya Ruhengeri) wabahaye ikaze, Ibigo Nderabuzima n'Abajyanama b'Ubuzima bahagarariye abandi, Abakozi muri uyu Murenge n'abandi.

Abari bitabiriye bakereye gukurikirana gahunda yari yateganyijwe

Ubutumwa bwatanzwe bwahurizaga ku gushimira Ubuyobozi bw'Igihugu cyacu budahwema Gutsura Umubano n'ibindi Bihugu, MINISANTE, Inzego z'Ibanze  n'ubwitange bw'Abajyamama b'Ubuzima, batangiye batanga amakuru nk'Urwego rwegereye abaturage kurusha izindi none ubu bakaba bageze  no ku rwego rwo kubavura.

By'umwihariko, hasabwe kurushaho kongera ubufatanye mu gutanga amakuru kuri iyi ndwara y'ibibari kugira ngo bamenye ko ivurwa igakira, kurwanywa akato ku bayifite, mbere na nyuma yo kuvurwa, bityo babeho bishimye kandi muri Sosiyete ibishimiye.

Dr.HIRWA Aime mu ijambo ry'ikaze

Intumwa y'Akarere ishima ubu bufatanye bw'Inzego anabizeza umusanzu w'Akarere mu ishyirwa mu bikorwa ry'iyi gahunda

Uhagarariye Operation Smile, ari kumwe na BIRIMOYESU Ennock, umwe mubavuwe iyi ndwara (ufashe indangururamajwi), atanga ubuhamya kubari aho, abasangiza ubuzima yari abayemo mbere yo kumenya ko hari amahirwenk'aya no kuvurwa,  n’aho ageze ubu yiyubaka, binyuze mu gusabana n’abandi aho atuye, kubera Ubuyobozi Bwiza.

Umushyitsi Mukuru atanga impanuro

Muri uyu muhango kandi uyu Mufatanyabikorwa yatanze amagare ku Makoperative y'Abajyanama b'Ubuzima, rimwe, rimwe kuri buri   Koperative, n'ibindi bikoresho bizajya bibafasha kugera ku baturage, yabimburiwe n’iryahawe uyu Ennock kugira ngo ajye abona uko azatanga umusanzu we mu Bukanguramabaga bijyanye n’uru rugamba. Mu bindi byatanzwe, Madamu ABIMANA Ruth, Umukozi Ushinzwe Ibikorwa by'Abajyanama b'Ubuzima mu Bitaro Bikuru bya Ruhengeri na we yahawe Tablet.

Ennock ahabwa igare rizamufasha mu bukangurambaga kugira ngo intego yifuzwa ishobore kugerwaho n'aya mahirwe agere kuri bose

Wasojwe n’urugendo kuri ayo magare, ku babishoboye, rwatangiriye aho ku Karwasa rugasorezwa ku Bitaro mu rwego rwo kwishimira iyo Sabukuru, nyuma y'Itorero ryasusurukije abari aho.

Ku Bitaro