Mu rwego rwo gukurikirana ishyirwa mu bikorwa rya Gahunda y'Icyumweru Cyahariwe Kwita ku Buzima bw'Umubyeyi n'Umwana cyatangiye ejo ku itariki ya 16 Gicurasi 2022 hirya no hino mu Gihugu, kuri uyu wa Kabiri tariki ya 17 Gicurasi 2022, Umuyobozi Mukuru w'Ibitaro Bikuru bya Ruhengeri, Dr.MUHIRE Philbert, arimo yasuye Site zitandukanye zirimo gukorerwaho ibikorwa bitandukanye biteganyijwe muri iki Cyumweru.

Aha ni kuri Site ya Kabirizi, imwe muri Site 6 zateguwe mu Ifasi y'Ikigo Nderabuzima cya Kwarwasa, kuri GS MATA ho mu Murenge wa Gacaca, mu Kagari ka Kabirizi, mu Mudugudu wa Mata, mu kiganiro n’abana b'abakobwa barimo gukingirwa Kanseri y'Inkondo y'Umura. Yakiriwe n'Umuyobozi w'iri Shuri, Bwana MPARIYIMANA Theophile.

Uretse aha mu Murenge wa Gacaca, Dr.MUHIRE yakomereje uru Ruzinduko rw’Akazi mu Murenge wa Musanze, mu Kagari ka Kabazungu, aho yifatanyije n’Abayobozi mu Nzego zitandukanye za Gisivile n’iz’Umutekano mu Gutangiza ku mugaragaro iki Cyumweru ku Rwego rw’Akarere ka Musanze; Umushyitsi Mukuru yari Umuyobozi w’Akarere, Bwana RAMULI Janvier.

Iki Cyumweru cyateguwe na Minisiteri y'Ubuzima, ibinyujije mu Kigo cy'Igihugu Gishinzwe Ubuzima, ku bufatanye na Minisiteri y'Ubutegetsi bw'Igihgu, Minisiteri y'Uburezi, Minisiteri y'Uburinganire n'Iterambere ry'Umuryango, Imbuto Foundation n'abandi Bafatanyabikorwa, gitegurwa inshuro ebyiri mu Mwaka, buri Mezi Atandatu. Kuri iyi Nshuro, Insanganyamatsiko iragira, iti: "Tunoze Isuku, Turinde Abana Indwara Zibatera Kugwingira”.

Iyi gahunda ikaba yari yakomatanyijwe  n'iy'Ubukangurambaga ku  Miyoborere n'Imibereho Myiza mu Muryango, bwateguwe na MINALOC, MIGEPROF, MINEDUC, MINISANTE, MINIJUST, MIFOTRA, MINEMA, MoE, RNP, NPPA, GMO, RBC, NCDA, IMBUTO Foundation n'abandi Bafatanyabikorwa, ku Nsanganyamatsiko igira, iti: "Twubake Umuryango Ushoboye kandi Utekanye.”

Ubutumwa bwatanzwe bwahurizaga ku gushimira abari bitabiriye no kubasaba kuba intumwa nziza mu gushishikariza bagenzi babo kub ahiriza ibikorwa byateganyijwe muri izi gahunda no guharanira imibereho myiza n’iterambere bya buri wese n’iry’Igihugu muri rusange.

Basoje hatangwa ibinini by'inzoka n'ibya Vitamini ku Bana Bari Munsi y'Imyaka 5, kubapima ibiro, uburebure ndetse n'ikizigira, igikorwa cyabereye aho ku Biro by'akagari ari nabyo bikorerwamo n'Ivuriro ry'Ibanze rya Kabazungu, ku bufatanye n'Abajyanama b'Ubuzima.