Iyi ni ingingo nyamukuru yaganiriweho mu Mwiherero w'Iminsi Itatu w’Ibitaro Bikuru bya Ruhengeri waberaga mu Karere ka Rubavu kuva kuwa Gatatu tariki ya 24 Kanama 2022 kugeza kuri uyu wa Gatanu tariki ya 26 Kanama 2022, wari wahurije hamwe Abagize Komite y'Ubuzima muri ibi Bitaro n'Abakozi babyo Bakuriye Abandi mu Byiciro bitandukanye.

Uyu mwiherero wari wateguwe mu rwego rwo kurebera hamwe, mu buryo bwagutse, ibyiza tumaze kugeraho, ibibazo duhura nabyo no kurushaho kubaka imikorere n'imikoranire mu kubikemura mu buryo burambye, nk'uko byasobanuwe n'Umuyobozi Mukuru w'Ibitaro, Dr.MUHIRE Philbert, atanga ikaze.

Mu mpanuro za Perezida wa Komite y'Ubuzima y'Ibitaro Bikuru, Bwana BAGIRUWIGIZE Emmanuel, atangiza ku mugaragaro uyu mwiherero, yakebuye abari bitabiye muri aya magambo: “Wowe urumva hakenewe iki kugira ngo imitangire ya serivisi muri ibi Bitaro igere ku rwego rwifuzwa?"

Muri rusange, ibibazo byagaragajwe bikaba byahurizaga ku mubare muto w'Abakozi ugereranyije n'uw'abarwayi bakirwa, utuma bakora n'amasaha y'ikirenga, ibikoresho bidahagije ndetse n'imiterere y'Ibitaro byacu bishaje.

Aha, nyuma yo kongera kwibutswa inshingano, buri Mukozi akaba yarahamagariwe kubaha umurimo we no kumva ko ari Umuyobozi w'Ibitaro ku Rwego rwe, binyuze mu kuba intangarugero muri byose (mubyo akora, avuga ndetse n'uko agenda). 

Ku ruhande rwa Komite y’Ubuzima, nayo yabizeje kurushaho kubaba hafi, kandi by'umwihariko inashima cyane Imishinga 5 yateguwe n'Ibitaro, nka kimwe mu bisubizo birambye mu gufasha abarwayi ndetse no kongera amafaranga yinjizwa n'Ibitaro; isabye  ko yanozwa vuba igatangira bidatinze.

Iyo Mishinga ni ICU (Intensive Care Unit), ENDOSCOPY, SURGICAL OUTREACH, DCP (Dual Clinical Practice) na DENTAL- OPHTALMOLOGY- ANTENATAL CARE OUTREACH.

 Umurwayi ku Isonga, nicyo cyivugo gitahanwe n'impande zombi.