Ni kuri uyu mugoroba wo kuri uyu wa Kane tariki ya 22 Kamena 2023, ubwo Umuyobozi w’Akarere ka Musanze Wungirije Ushinzwe Imibereho Myiza y’Abaturage, Madamu KAMANZI Axelle, yasuraga Ibitaro bya Ruhengeri ari kumwe n’Itsinda ryaturutse mu Itorero rya FATHERHOOD SANCTUARY rikorera muri aka Karere, mu Murenge wa Cyuve, mu Kagari ka Bukinanyana, mu Mudugudu wa Bubandu, ryari rihagarariwe na Madamu NGABIRE Jeanne d’Aarc ukuriye Abadamu muri iryo Torero.

Impamvu nyamukuru y’uru ruzinduko, muri bwa bufatanye bw’Akarere n’Abafatanyabikorwa bako mu gushakira umuti ibibazo bitandukanye byugarije abaturage, cyari igikorwa cy’urukundo cyo gusura no gufasha Madamu NYIRANZABONIMPA Julienne uherutse kwibarukira abana batatu muri ibi Bitaro. Ni abakobwa 2 (IRAKOZE Julienne, wavyukanye ibiro bibiri n’amagarama ijana, na NIYIGENA Olive w’ikiro kimwe n’amagarama magana inani) na Musaza wabo ITANGISHAKA Jackson, wavukanye ikiro kimwe n’amagarama magana arindwi.

Bakigera mu Bitaroi berekeza kuri Serivisi ya "Neonatology"

Umuforomokazi abakira anasobanurira ababyeyi ikibagenza

Bimwe mu bikoresho by'isuku n'imyambaro bamuhaye

Uyu mubyeyi atuye mu Murenge wa Cyuve, mu Kagari ka Kabeza, mu Mudugudu wa Karinzi, ababa bana bakaba baje bakurikira imfura ye ubu ifite imyaka irindwi y’amavuko, IGIHOZO Confiance, akaba asanganwe amikoro make ngo kubera ko yatungwaga no guca inshuro bityo ubu akaba afite ibyishimo ariko n’amaganya ngo kubera ko abona nta bushobozi azabona bwo gutunga aba bana Imana Imuhaye, dore ko ngo n’umugabo bari barashakanye, HARERIMANA Dieudonne, ngo ubu yamutaye mu nzu akajya gushaka undi mugore, ngo akaba aza mu rugo rukuru rimwe na rimwe.

Mu izina ry’Ubuyobozi bw’Akarere ka Musanze, uyu Muyobozi w’Akarere Wungirije akaba yamuhaye impundu akanamwizeza ko nk’Ubuyobozi bafite inshingano zo kumuba hafi, kandi ko abo bana ari abe ariko by’umwihariko bakaba ari ab’Igihugu, ikaba ari nayo yari intero n’inyikirizo kuri aba Bafatanyabikorwa bari kumwe, bari baje kumusura bitwaje ibikoresho by’isuku n’imyambaro; igikorwa yishimiye cyamugaruriye icyizere gikomeye.

Uruzinduko rwasojwe n'Isengesho bamuragiza Nyagasani.