Mu gitondo cyo kuri uyu wa Gatatu tariki ya 26 Mata 2023, mu Bitaro bya Ruhengeri hatangijwe ku mugaragaro Amahugurwa ajyanye no Kwita mu Barwayi Barembye (Basic and Advanced Cardiopulmonary Resuscitation, including Life Support), yateguwe n’ibi Bitaro ku bufatanye ku bufatanye na Miguel Hernandez University yo mu Gihugu cya Esipanye. 

Ibi bikaba biri mu rwego rw’ishyirwa mu bikorwa rya Gahunda y'Amasezerano yasinywe hagati y'ibi Bigo byombi, binyuze muri Minisiteri y'Ubuzima, hagamijwe imikoranire mu guhugura abakozi, mu gukora ubushakashatsi ndetse no mu gushaka ibikoresho bifasha mu kwita kuri abo barwayi barembye.

Ni igikorwa kizakorwa mu byiciro bitandukanye, ku ikubutiro hakaba haje itsinda ry'Abaganga 2, aribo Jose Moya (umugabo) na Gema Ruiz (umugore), bakiriwe n'Umuyobozi Mukuru w'Ibitaro, Dr.MUHIRE Philbert, wabashimiye bikomeye inyunganizi nk'iyi, akabizeza ko izabyazwa umusaruro uko bikwiye, utegerejwe n'impande zombi, ari nacyo cyifuzo ku mpande zombi.

Abakozi bateganyirijwe aya mahugurwa ni abakorera muri serivisi zose zikorera hano mu Bitaro, Abavura n'Abakozi babunganira barimo n'Abashoferi, Kompanyi Ishinzwe Umutekano, Kompanyi Ikora Isuku, Abakozrera muri Cantine n'abandi; barajya bahugurwa ku minsi  itandukanye kugira ngo n'akazi gasanzwe gakomeze gakorwe, abarwayi babone serivisi bifuza umunsi kuwundi, nk’uko bisanzwe.